Tiang (lima kanan), Chen (empat kanan), Chairman SMC Clarence Ting (empat kiba) enggau bala bukai sama ngaga simbolik bejadi Festival Rejang Esplanade's di Rejang Esplanade's ditu, bedau lama ti udah.

SIBU: Sebuah Palan Seni Pemerindang ti betikas antarabansa diperambu deka ditumbuhka dalam ngangkatka industri seni pemerindang di Sibu ba tikas ti tinggi agi.

Sapit Menteri Pengerai Mensia Mayuh, Pengawa Berumah enggau Kaunsil Kandang Menua Datuk Micheal Tiang madah, enggau sukung ari Opis Kaunsil Mengeri Sibu (SMC), iya deka madahka perambu tu ngagai perintah Sarawak.

“Di Kuching sida nyadika Kunsil Nengeri (DUN) ti lama nyadi Palan Seni Pemerindang ke baru dikena nyendiaka platform tu ngagai artis di menua kitai.

“Nya alai, aku ngembuan penemu Sibu mega begunaka sebuah Palan Seni Pemerindang lalu aku pechaya SMC bisi juluk ti sama.

“Ungkup ari aku, aku deka madahka perambu tu ngagai perintah Sarawak dalam meri peluang sereta diperundingka enggau bebendar lalu dekaka tu nyadi juluk besai kitai,” ku iya.

Iya madah munyi tu lebuh ti bejaku maya bejadi Festival Rejang Esplanade's di Rejang Esplanade's ditu, bedau lama ti udah.

Beserimbai enggau tu, Kaban Kunsil Nengeri (ADUN) Pelawan tu muji pengeransing Hornland Dance Theatre ari baruh pegai Chen Ing Kuan ti ngatur pengerami tu dalam nyendiaka platform ngagai raban artis menua tu ngayanka pengelandik seni sida ngagai mensia mayuh.

Ku iya, Hornland Dance Theatre mega udah aktif ngatur mayuh macham seni pemerindang semanjai 30 taun ke udah kenyau ditumbuhka ba taun 1995.

“Komitmen kita, pengeransing kita dalam industri tu, komitmen kita dalam seni pemerindang, tu udah ngemegahka mayuh orang.

“Aku ngarapka, ari baruh pegai Chen, iya deka terus ngelatih, ngiga raban betanda ke baru, mai seni pemerindang ba Sibu, ia mega mai semua raban artis kitai ke palan bukai ngaga seni pemerindang di selampur Malaysia, pia mega ke menua luar,” ku iya.

Beserimbai enggau tu, Tiang mega besemaya meri agih belanja ngagai Hornland Dance Theatre nyadika keali meri sukung ngagai organisasyen tu ba komitmen sida ngangkatka seni pemerindang ditu.

Beserimbai enggau tu, pengerami ti berengkah ari pukul 4 lemai diatur enggau mujur taja bisi ujan urung pukul 6 lemai.

Mensia mayuh enda ngelengkaka peluang ngemataka pemerindang tanda moden enggau tradisional ke dibantaika raban sida ti betanda ari Sarawak sereta mega ari luar iya nya ari Semenanjung Malaysia enggau Singapura.

Aktiviti bukai ti sama diatur iya nya mantaika fesyen, cosplay, bazar, belagu enggau ke bukai.