(Dua ari kiba) Tan Kai, Wee, Yap, Dr Sim enggau Lo begambar bebala mayuh enggau bala media ba pengerami seprumpu makai lemai, ensanus. -Gambar Chimon Upon

KUCHING: Sapit Premier Sarawak Datuk Amar Dr. Sim Kui Hian nyangkal dawa ti madah Kaban Kunsil Nengeri (ADUN) Batu Lintang See Chee How masuk Parti Sa'Ati Rayat Sarawak (SUPP) tang iya nerangka See begulai manah enggau Gabungan Parti Sarawak (GPS).

Dr. Sim ti mega Presiden SUPP madahka pekara nya lebuh dirandau raban media pasal penatai See ba pengerami Serumpu Makai Lemai begulai enggau Media diatur Dr. Sim di Pusat Konvensyen Borneo Kuching (BCCK) ditu, malam Hari Tiga.

See ti dipeda ba pengerami nya, meri awak diri enda lama begulai enggau Dr. Sim sereta temuai dipebasa bukai, sebedau pulai.

Berindik ari pekara nya, Dr. Sim nerangka, See udah bekerejasama enggau GPS sereta Premier dalam sekeda projek.

"Aku nganggauka YB See datai sereta sama enggau serumpu makai lemai tu laban enti enda, iya deka kediri.

"Iya mega deka sama enggau kami nyadi sebagi ari komiti pengatur nerima pengabang tauka rumah tebuka nyerumba ngintu Taun Baru China ti deka diatur perintah Sarawak taun tu," ku iya.

Ditanya sekalika See udah nyerahka peminta masuk SUPP, Dr. Sim madahka, nadai.

"Iya enda masuk parti aku, iya begulai enggau GPS.

"Aku ngasaika beguna meda lebih ari nya awakka DUN Batu Lintang terus bulih pemansang berindik ari bisi isu baka bah tunggal enggau ti bukai, enggau semua pekara ti begunaka ungkup belanja ti manah," ku iya.

Dr. Sim mega dipinta ngenang dipelaba SUPP 'muka pintu' ke See, laban kedua-dua udah bekereja enggau bekunsi begulai.

"Kami (SUPP) seruran 'muka pintu' ke semua orang. Tang sekeda orang milih enda enggau (kami).

"Aku nadai ulih bejaku. Bisi sekeda orang ninggalka parti sereta milih enda nikal," ku iya.

Bekaul enggau See, iya terus gawa ke pengundi iya nyadi pengari rayat Bebas tauka ngantika diri pengudah ngelengka ke penuduk ba Parti Sarawak Bersatu (PSB) kena 14 Ogos 2022.

Sama bisi datai ngagai pengerami nya, Sekretari Politik ngagai Premier Sarawak Kho Teck Wan,  Datuk Bandar Majlis Bandaraya Kuching Selatan (MBKS) Dato Wee Hong Seng, ADUN Batu Kitang Dato Lo Khere Chiang, ADUN Kota Sentosa Wilfred Yap enggau Chairman Majlis Perbandaran Padawan (MPP) Tan Kai.