KUCHING: Perintah Sarawak benung ngaga 'Dasar Peralihan Tenaga' (ETP) kena nentuka negeri enggau rayat bisi energi ti selamat, beresi, patut sereta sikar ti selamat sereta tau dikearapka.
Premier Sarawak Datuk Patinggi Tan Sri Abang Johari Tun Openg madah, Sarawak bisi mayuh jalai pemansut energi ti tau dikemaru baka kuasa hidro, solar enggau angin.
Jalai pemansut tu ku iya, tau di kena ngasilka elekterik ti beresi sereta patut ti ulih nyaup ngurangka Sarawak bepanggai ba minyak fosil sereta ngurangka ubah gaya hari.
“Nya alai aku udah minta Sarawak Energy Berhad ngaga Pelin Energi Tau Dikemaru sereta jampat agi ngaga projek energi tau dikemaru,” ku iya.
Iya madah munyi nya maya bejuraika langgur Bajet Negeri 2024 maya Aum Kunsil Negeri (DUN) Sarawak ba Kompleks DUN ditu,kemari.
Sarawak Ku Abang Johari, mega komited kurang ngemansutka sereta ngembuan juluk dalam chara pro-dagang enggau pro-pemansang ti beresi, setipak enggau komitmen Malaysia ngagai nadai ngemansutka karbon ba pun taun 2050.
“Ke tuju nya, Perintah Sarawak deka ngungkupka RM2 juta taun baru dikena ngaga Pelin Karbon enggau 'Strategi Sifar Bersih' dikena Sarawak nyapai tagit nya manggai ba taun 2050.
“Tu n yengkaum polisi ungkup makit enggau dagang karbon ti diaku ba renggat antarabansa,” ku iya.
Nyadika penambah ngagai energi tau dikemaru, 'Dasar Peralihan Tenaga Adil' deka meransang pemansang hidrogen gadung, biotenaga enggau CCUS (nangkap, ngena enggau naruh karbon).
Teknologi tu ulih mantu dikena nyahkarbon sektor energi Sarawak sereta nyapai juluk gaya hari timpuh panjai negeri.
Ku Abang Johari, perintah mega benung bejalaika pansik bekaul enggau Polisi Ubah Gaya Hari Sarawak enggau Langkar Kereja 'Masyarakat Rendah Karbon' di Kuching, Miri, Sibu enggau Bintulu ngena agih belanja RM1.5 juta.
Nengah pansik tu, latur mitigesyen enggau ngenipakka deka digaga kena ngurangka gis rumah gadung sereta nambahka pengena gaya hari.
Dikena ngenegapka pengawa tu, perintah ku iya deka ngemunka Pansik Pelin Kereja enggau Polisi Ekonomi Gadung Sarawak ngena ungkup belanja RM3 juta ba taun 2024.