SIBU: Projek ngaga begunan opis kaunsil di Sibu Jaya deka dikemeratka Opis Kaunsil Pelilih Menua Pesisir Sibu (MDLBS) taun tu.
Chairman MDLBS Sempurai Petrus Ngelai madah, pengudah pelin begunan nya dikemendarka, pengerami nasih tanah deka diatur lengkas.
"Kami melabaka pengerami nasih tanah tu deka diatur dalam taun tauka tengah taun tu. Kami deka ngenyampatka pengawa ngaga nya laban projek tu udah lama diperambu.
"Ba timpuh ke sama, kami deka bisi begunan kediri empu ambika tau lebih fokus ngagai kandang menua ke ari baruh bidang kuasa kaunsil," ku iya madah maya media,kemari.
Enti nitihka perambu tumu ku Sempurai, sida udah ngangauka Premier Sarawak Datuk Patinggi Abang Johari Tun Openg bejadi pengerami nasih tanah.
Kelimpah ari nya ku iya, MDLBS mega deka beratka projek Palan Transit Bukit Tinggi ti ba tengah-tengahdalam kandang jalai Pan Borneo,ti udah dikemendarka Premier Sarawak maya Pengawa Bepilih Negeri suba.
"Palan tu beguna amat ba kami laban tamu enggau palan bejaja di Sibu Jaya udah sekut. Enggau pemisi palan transit tu, kami ulih nyendiaka tamu enggau palan bedaja ke baru dia.
"Ba timpuh ke sama, kami deka nentuka kandang endur palan transit nya dikemansang sereta ulih nyaup muka peluang komersial ngagai peranak ba endur nya," ku Sempurai seraya madah palan transit nya semak enggau pasar mit Durin tauka 16 kilometer ari Sibu Jaya.
Kelimpah ari nya, kaunsil mega deka ngezet palan parking ba endur nya ari baruh bidang kuasa sida iya ambika bayar parking tau dipejalaika, kelebih agi ba Pasar Baru Sibu Jaya.
Bayar parking ku iya, beguna amat kena nambah penatai pemisi opis kaunsil ambika ulih meri servis ti manah agi sereta mungkur semua pekara ngagai komuniti.