KUCHING: Sekretari Besai Gerempung Graduet Dayak Sarawak (SDGA) udah nyiri komiti eksekutif penggal 2023/2025 maya Aum Besai Ninting Taun Ke-18 kena 25 Mac nyin kemari ditu.
Nitih ku ripot Sekretari Besai SDGA Jordan Anthony Layan, Chairman Pengawa Nyiri Rev. Kelvin Jawa mega udah meri jaku lalau lalu ditangkanka enggau pengawa nyiri menijer opis SDGA enggau semilan Komiti Eksekutif ungkup penggal 2023/2025.
Berindik ari nya Dr Jawing Chunggat udah megai pangku pengawa nyadi Presiden SDGA lalu Sapit Presiden dipenggai Dr Florianna Lendai Micheal lalu Mandal Presidan Dr Joshua Bakir Nuing, Sebestiano Mike atet enggau Gilbert Thomas Laing.
Sapit Sekretari Besai SDGA dipegai Darrel Nadeng Dominic, Tukang Wang Besai Rudy Ujang enggau Sapit Tukang Wang Besai Jordie Jara Julian.
Beserimbai enggau tu mega komiti eksekutif dipenggi Alexandra Nastassia John, Alezxandria Kapple, Alicia Augustine Liom, Beatrice Minda Bale, Christopher Linggoh, Cliff Jude Zehnder, Marvin Sait Bale, Priscilla John Pillai sereta Reily Repai Maringai.
Ba aum tu mega, Dr Jawing bisi madahka setipak enggau tema ke udah ditentuka ungkup penggal baru iya nya SDGA #KeepMoving bepelasarka pemun strategik dalam pelajar enggau bekunsi penemu.
Pia mega pemansang pengelandik, kaul enggau komuniti, pengawa nyadi orang dagang enggau nemu bekaul pekara wang sereta literasyen digital.
Aum tu mega udah sama bela besetuju iya nya bayar nyadi kaban seumur idup ungkup graduet Dayak ke umur 40 taun ke baruh enda dikena semanjai penggal 2023/2025.
Kebuah pia, tu dikena meransang enggau naka mayuh ti ulih bala graduet Dayak biak ti berejista enggau gerempung lalu meri sukung ngagai komuniti kelebih agi.
Graduet Dayak ti beumur 40 taun ke baruh ulih ngerejista nyadi Kaban Seumur Idup enggau enda bebayar ba laman web gerempung tu.
Kaban 'Bersekutu' ari baruh 40 taun mega ulih ngangkatmanah nyadi Kaban Seumur Idup enggau enda bebayar lalu dipinta ngaga pengawa ngerejista baru.
SDGA komited deka terus nyadi pelasar ti beguna ungkup raban graduan Dayak ngaga kaul, bekunsi penemu enggau meri sukung ngagai pengawa pemansang menua.