Alexson nyuaka setipikit Pengaga Ati ngagai siku pemesai polis beserimbai enggau Pengerami Gempuru Ninting Bulan IPD Miri, kemari.

MIRI: Raban bansa China ti mulaika diri ke menua beserimbai enggau Taun Baharu China (TBC) ujung minggu tu dilalau madahka sida mulaika diri ba balai polis ke semak enggau sida.

Kepala Polis Pelilih Menua Miri ACP Alexson Naga Chabu madah, tu beguna amat ambika polis tau bejalaika pengawa matau ba kandang rumah sida maya kemisi panjai TBC.

"Padahka ngagai polis ambika tim kami tau bejalaika pengawa maatau lalu awakka nadai nyadi penusah rumah kena keruga maya musim pengerami," ku iya madah maya Pengerami Begempuru Ninting Bulan IPD Miri, kemari.

Iya mega meri Selamat Tahun Baru China ngagai semua raban bansa China nyengkaum pemesai enggau raban polis ti ngintu  pengerami nya.

Berebak enggau nya, Alexson madahka indeks pengawa jai di Miri udah nurun 51 peratus sepemanjai taun siti nyin tadi ti ngujungka bisi kurang 292 kes.

Di bandingka enggau taun ke sebedau nya, bisi 569 kes dalam timpuh Januari nyentuk Disember 2021 ngagai 277 kes ungkup timpuh ari Januari nyentuk ke Disember 2022.

"Ba statistik nangkap orang gian dadah, bisi nambah iya nya 563 iku ditangkap dalam timpuh ari bulan Januari nyentuk ke Disember 2021 enti dibandingka enggau timpuh ke sama taun siti nyin tadi ke bisi 849 iku," ku iya.

Iya madah, penambah nya bisi 50.7 peratus ti mandangka pengeran polis ngelaban kes gian dadah.

Ba pengerami, iya mega bisi nyuaka setipikit pengaga ati ngagai 55 penerima baka pemesai enggau raban  anggota polis sereta pemesai perintah.

"Aku temegah amat ati ngagai semua raban IPD Miri ti udah bejalaika pengawa enggau manah sekalika ari sukut bejalaika pengawa ba opis tauka operasyen polis," ku iya.

Ku iya, basa tu udah ngangkatka semengat bakih bukai ambika semampai lebih produktif lebuh bejalaika pengawa ninting hari.

Sama bisi maya nya, Kepa Bagi Nagang Pengawa Jai enggau Pengelikun Komuniti Miri, Nor Aizan Mohd Jamil.