KUCHING: Lampu trafik ba simpang Tabuan Tranquility diatu beoperasyen lalu dibuka ngagai mensia mayuh.

Sapit Premier Sarawak Datuk Amar Douglas Uggah embas madahka simpang lampu trafik Tabuan Tranquility iya nya ti keterubah ari lima ti deka ditembuka ba sepemanjai Jalai Besai Kuching-Samarahan.

"Kami nukar lima roundabout ba sepemanjai Jalai Besai Kuching-Samarahan nyadi simpang lampu trafik awakka pejalai trafik ti lebih lanchar ba kedua-dua tuju jalai nya.

"Aku udah dipadahka iya nya kereja nukar empat roundabout ke bukai (nyadi simpang lampu trafik) bejalai enggau lanchar lalu deka tembu lebuh manggai ujung taun.

"Aku arap bendar ngagai pengulih kunteriktor ngaga nya," ku Uggah pengudah bejadi pengawa muka simpang lampu trafik baTabuan Tranquility ditu, kemari.

Sama bisi datai ba pengerami tu, Sekretari mendam Opis Menteri Pemansang Infrastruktur enggau Palan Penyangkai Kapal (MIPD) Chiew Chee Yaw, Direktor Opis Kereja Raya (JKR) Sarawak Richard Tajan enggau Chairman Opis Kaunsil Kota Samarahan Dato Peter Minos.

Nerang pekara nya enggau silik, Uggah madahka nembuka simpang lampu trafik keterubah nya ngayankan pemansang ti chukup positif.

"Aku meda pagi tu baka ni iya udah mantu ngelancharka pejalai trafik. Mensia mayuh ti bertengah jalai alun tu tiap hari nganti penembu projek tu enggau empat iti agi ke bukai.

"Aku nemu kenyau beberapa hari ke udah, penyampau trafik ba sepemanjai Jalai Besai amat balat ti ngujungka penyekut jalai balat nyadi. Tu laban beberapa jalai enggai nyadi enda ditutup kena ngemudahka proses ngemanahka agi jalai nya.

"Nya alai aku mesti beterima kasih ngagai penguna jalai alun ke pengeliat ati sida. Mensia mayuh ulih meretika iya nya maya kami ngaga empat (simpang lampu trafik) ke bukai, deka mayuh pekara ngeruga enggau penanggul," ku iya.

Pekara tu terang iya, enda ulih diseliahka lalu berindik ari nya sida iya minta ampun.

"Tang tulung teruska sabar enggau kami. Kami deka ngereja iya enggau pengabis manah kena ngaduka pejalai (trafik)," ku Uggah.

Semua pakej ngemanahka agi jalai tu sepenyampau RM72.7 juta udah diberi ngagai kunteriktor penyelamat, Glumox Abiz Sdn. Bhd. pengudah kunteriktor keterubah enda ulih bejalaika tanggungpengawa baka ti dikearap.

Kunterik nya udah diberi kena 11 Oktober taun nyin kemari.