Endang nyadi tanggungpengawa pengari rayat ke dipilih rayat ngemajuka sitak sida lalu ngintu nasit rayat iya

Abdullah, Ding, Teng enggau Samuel maya Program Aram Begempuru UKAS ba Rumah Peter Kilas, Selidap, Bintangor ensana.

"Kami mega ngarapka rayat Sarawak terus beserakup sereta enda charut baka di Semenanjung.”

Datuk Abdullah Saidol Sapit Menteri ba Opis Premier Sarawak (Pekara Korperat, Pemadah enggau Unit Komunikasyen Perintah Sarawak - UKAS) 

BINTANGOR: Perintah enggau pengari rayat ari Gabungan Parti Sarawak (GPS) ibuhka pemansang di menua pesisir, dereta deka ngerapitka seraka pemansang di menua pesisir enggau mengeri.  

Sapit Menteri ba Opis Premier Sarawak (Pekara Korperat, Pemadah enggau Unit Komunikasyen Perintah Sarawak - UKAS) Datuk Abdullah Saidol madah, endang nyadi tanggungpengawa pengari rayat ke dipilih rayat ngemajuka sitak sida lalu ngintu nasit rayat iya. 

Kena mandangka komitmen nya, iya maya Program Aram Begempuru UKAS ba Kampung Perdana, Rumah Peter Kilas, Selidap ensana, madahka perintah negeri ngemendarka RM74,300 dikena ngemanahka palan penyangkai ba rumah panjai nya.Nnya sitak pengundi Kunsil Negeri (DUN) Meradong enggau DUN Semop.

Kaban Parlimen Tanjong Manis, Yusuf Abdul Wahab ti sama bisi ngulu program nya ngungkupka belanja RM400,000 ari perintah besai dikena melakin jalai nuju ke Rumah Peter Kilas.

Abdullah ke mega Kaban Kunsil Negeri Semop ngarapka maya Pengawa Bepilih Besai (PRU) tu ila, chalun GPS ulih menang ba kerusi Parlimen Sarikei yke diatu disandang pengari ari DAP.

Ku iya, pemujur menang besai amat reti kena nentuka kerejasama penuh ari bala pengari rayat GPS, ambika beserakup ngemansang agi ksitak nya ari sukut sosial enggau ekonomi.

"Kami mega ngarapka rayat Sarawak terus beserakup sereta enda charut baka di Semenanjung.

"Ungkup rebak biak engagu nembiak sekula, kami dekaka sida seruran beratka pemansang enggau pemujur dalam bidang pelajar laban sida deka nyadi ketuai menua jemah ila," ku iya.

Berebak enggau nya, iya amega bisi ngenang pasal pemesai guna kerejasama enggau pemereti ati ba bala pengari rayat GPS ke berimbai sitak, kena nentuka perambu enggau bejalaika projek pemansang ke bekaul entara dua sitak DUN dulih dipejalaika enggau mujur.

“Enti bala pengari rayat DUN GPS ti sepenemu kelebih agi ti berimbai sitak, nya deka nentuka pengelantang pendiau raban bansa dalam sebuah sitak parlimen nya mudah diaduka sechara holistik,” ku iya.

Ba pengerami nya, Abdullah mega bisi nyuaka geran MRP RM25,000 ngagai JKKK Rumah Peter Kilas (RM6,000), Kelab Rekreasyen MDMJ (RM5,000), SABERKAS Pampang Meradong (RM5,000), Kelab Ukhuwah Meradong (RM3,000), Kelab Nembiak Seberai Bintangor (RM1,000) enggau Gerempung Bala Tuai Rumah Meradong (RM5,000).

ADUN Meradong, Datuk Ding Kuong Hiing mega bisi meri RM2,000 ngagai Biro Indu Rumah Peter Kilas.

Sama bisi ngulu pengerami nya, Pemangku Direktor UKAS Samuel Simon, Sekretari Politik Premier Sarawak Teng Ung Woo enggau D.O Meradong Badjuri Bidin.