KUCHING: Pemutus nerima peminta Sapit Menteri Industri Ladang enggau Komoditi Datuk Willie Mongin nyemilik Parti Pesaka Bumiputera Bersatu (PBB) dilempaika ba presiden enggau Kaunsil Tetinggi PBB.

Mandal Presiden PBB, Dato Sri Abdul Karim Rahman Hamzah madah, pekara mesti diperundingka lalu beratika sekeda sukut.

"Tentu kami mesti meda sekeda sukut dalam pekara tu. Entara nya, Kaunsil Tetinggi PBB mesti ngaga pemutus pengudah bulih rimbal ari tiga iku Kaban Kunsil Negeri (ADUN) ari bawah Parlimen Puncak Borneo.

"Laban ketiga-tiga Kunsil Negeri (DUN) ari baruh sitak nya endang PBB. Nya alai kamu patut berunding enggau sida," ku iya.

Iya  madah munyi nya lebuh dirandau media maya bejadi program 'Bringing The World To Lundu beserimbai enggau Miss Tourism International World Final 2022/2023 di Lundu, kemari.

Willie Mongin

Ku Abdul Karim baru, enti ketiga-tiga sida nya setuju nerima Willie tauka enda,Kaunsil Tetinggi PBB deka ngaga pemutus bepelkasarka pekara nya.

"Ba aku empu, aku ngasaika peminta iya deka nyemilik PBB mandangka pengandal iya ngagai PBB," ku iya.

Kena Hari Satu tu tadi, Willie ke mega Kaban Parlimen Puncak Borneo madahka diri udah minta nyemilik PBB.

Ku iya, peminta nyemilik parti nya udah digaga iya beberapa bulan ke udah.

"Ya, amat. Aku udah nganjung peminta nyemilik PBB enggau juluk sida nerima peminta aku.

"Ke rikod, enti perintah (besai) berubah, aku nadai nyemilik  sebarang parti politik tang aku enda amat nyukung perintah lalu sida(perintah maya nya) sechara teknikal ngengkahka aku ari baruh BERSATU (Parti Pribumi Bersatu Malaysia).

Nya ambika aku ulih nentuka bulih mayuh agi sukung ngagai perintah kemaya hari tu," ku iya lebuh ke d irandau maya Pengerami Simbolik Nyuaka Faedah Pencen Penakat PERKESO (Gerempung Pengelikun Sosial) ngagai aris di Kampung Semadang, Jalai Puncak Borneo.

Ku Willie, iya n gelempaika nya ba ketuai PBB nentuka status peminta iya nya.

Sitak Parlimen Puncak Borneo sebedau tu endang kuta kuat PBB ari bawah penyandang iya, niang Datuk Seri Dr James Dawos Mamit sebedau kerusi nya direbut Willie ti bediri minta pilih ngena tiket Parti Keadilan Rakyat (PKR) maya Pengawa Bepilih Besai Ke-14 (PRU14) dalam taun 2018.