KUCHING: Naka ke diatu, varian Delta ari novel coronavirus udah ditemu ba 111 menua, wilayah tauka kandang menua sereta benung nempa diri nyadi strain virus ke dominan di serata dunya.

Nitihka ripot Xinhua, Gerempung Pengerai Sedunya (WHO) kena Hari Tiga, pekara tu tau ngujungka penambah berampit enggau pemati baru.

Afghanistan, Nigeria, enggau Ecuador entara 15 menua ti ngeripotka kes ketrubah sida bekaul enggau varian ti balat amat ngelekai kena minggu nyin tadi, pia ku WHO nengah penerang berita.

Nya ngasuh kitai bejejaga ke alai strain Delta balat ngelekai ngagai mayuh agi menua lalu dipelabaka deka nyadi COVID-19 ke dominan "dalam beberapa bulan ke deka datai."

Nitihka penyampau ari WHO mega, kes COVID-19 mandangka penambah ngenyit dalam seminggu ke udah di serata dunya.

Kena 13 Julai tu tadi, Direktor Institut Pengerai enggau Perubat Komuniti (IHCM) Universiti Malaysia Sarawak (Unimas) Prof. Dr. David Perera madah, naka 4 Julai, Sarawak diatu bisi 17 kes varian Delta ti ditemu di Kuching.