KE PANSIK: Staf ari DVSS Lawas ngambi sampel babi ke mati di Long Tanid minggu siti nyin tadi.

MIRI: Opis Veterinar Sarawak (DVSS) diatu benung mansik kebuah pemati lima iku babi ti diripotka mati di Long Semadoh Rayeh enggau Long Tanid, semak enggau Ba’Kelalan di Lawas, pia ku direktor opis nya Dr Adrian Susin Ambud.

Dr Adrian lebuh ke dirandau The Borneo Post kemari madahka staf sida di Lawas udah diasuh bejalaika pansik bekaul enggau ripot pemati dua babi ba dua buah genturung pendiau nya, berindik ari penyadi penyakit African Swine Flu (ASF) di Sabah enggau Nunukan dalam kandang menua Krayan di utara Kalimantan, Indonesia.

“Sampel ari babi ke amti nya udah diambi dulu lalu nya baru kitai nemu sekalika babi nya bisi kena rampit ASF.

“Taja pia, babi nya tau mati ketegal kebuah bukai, laban enti nya ketegal, pemati nya ukai nyadi semina ba beberapa iku aja,” ku iya.

Dr Adrian mega madahka nadai pengamat bisi kes ASF di nengeri tu laban sampel ke diambi ari beberapa iku babi enggau jani kampung di serata nengeri, lebuh ke diperesa negatif penyakit nya.

Peranak ari Long Semadoh Rayeh, Singa Buas madahka bisi empat iku babi mati di Long Tanid minggu nyi tadi, lalu siku agi madahka siku babi mati di Long Semadoh Rayeh.

Dulu ari nya, ripot udah digaga ba DVSS Lawas pengudah peranak menua nya tetemuka jani kampung mati di Puneng Trusan kena 29 Jun.

Puneng Trusan nya semak amat enggau Long Pasia di Sabah ke alai sida ulih bedarat ngagai palan nya.

Kandang menua Krayan nya mega semak enggau Ba’Kelalan.

Kemari, DVSS madahka penyakit ASF nya nadai di Bagi Menua Kapit enggau Telang Usan.