CHIN

MIRI: Gerakan Sarawak For Sarawakian (S4S) deka nemu nama motif enggau rasional perintah besai deka meri vaksin COVID-19 bansa AstraZeneca ngagai Sarawak taja pan nemu rayat irau ati ke pengelikun vaksin nye enti dikena.

Pengari S4S Erick Chin madah, pemutus Menteri Sains, Teknologi enggau Inovasyen, Khairy Jamaluddin untuk nganjung vaksin nye ke Sarawak balat ngasa ke ati sereta ngeringatka rayat ditu.

"Sekalika Sarawak ba mata menteri palan muai uras ti diungkupka alai muai vaksin ti dikeenggaika nya," ku Chin nyemetak.

Perintah besai udah berengkah meri vaksin AstraZeneca ngagai bala volunteer ke minta nengah Palan Meri Vaksin (PPV) khas.

Khairy ke mega Menteri Koordinator Program Imunisasyen COVID-19 Menua(PICK)  madah, vaksin nya diberi ngagai Perintah Sarawak laban Sarawak nengeri ngerikodka mayuh kes berampit COVID-19 .

Taja pia, Menteri Kaunsil Kandang Menua enggau Pengawa Berumah, Dato Sri Dr Sim Kui Hian meri jamin ke alai vaksin AstraZeneca enda dikena di Sarawak.

Iya ke mega penyanding Penemu Komiti Mutar Penusah Ngenyi Nengeri Sarawak (JPBNS) madah, orang ke deka dituchuk ngena vaksin nya, tau betuchuk ba palan vaksinayen di Selangor enggau Kuala Lumpur.

Ku iya baru, Chin mega deka nemu sekalika perintah besai deka nanggung pengerai enggai enggau pengelikun penerima vaksin nya ila.

"Sekalika sida deka diberi pampas tauka deka ditanggung rayat empu?" tanya iya.

Ku Chin, penerang Khairy sentang pengelikun vaksin nya mega enda silik lalu semina meri langgur penemu ngambika nya diberi ngagai raban volunteer ke minta.

Berebak enggau nya, Chin deka ke perintah nengeri majak terit sereta berani bejaku kena nambahka pengandal enggau  sukung rayat, ke diatu mengkang irauka penambah ba kes berampit.