UNGKUP KENANG: Abdul Karim begambar kenang enggau bala penerima geran.

KUCHING:Sepenyampau RM5,030,600 geran diagihka ngagai 59 gerempung raban nembiak sereta lumba enggau main di nengeri tu.

Menteri Nembiak, Lumba enggau Main Datuk Abdul Karim Rahman Hamzah madah, opis menteri iya nyuaka geran kena nyungkak gerempung tu terus aktif sereta komited dalam bejalaika program sida empu.

Beserimbai engau nya, iya minta semua gerempung ti bekaul ngambika kreatif agi sereta landik ngatur program ti meruan nitiha Prosedur Operasyen Standard (SOP) ti ditetapka kelebih agi dalam pentin Atur Nagang Pemindah Bisi Penetap (PKPB) di nengeri tu.

“Tu kena nentuka Opis Menteri kitai ulih nyapai juluk komuniti bekerejasama sereta sebela ungkup visyen ‘World Class Youth and Sports For All By 2030’,” ku iya ba Pengerami Nyuaka Geran Raban Nembiak sereta Lumba enggau Main ba sebuah hotel tebilang ditu, kena Hari Enam nyin tadi.

Abdul Karim madah, perintah seruran bebendar ngelangkar mayuh agi program lumba enggau main begulai enggau Koperasi Lumba enggau Main sarawak ngambika ulih narit penyereta mayuh agi raban nembiak dalam bidang lumba enggau main.

“Kitai meda ari indeks Nembiak, Lumba enggau Main dipejalaika kena 2019, dirikodka tikas pengulih kualiti enggau pengelantang idup raban nembiak ba tikas jelan enggau skor 70.62.

“Ari perspektif lumba enggau main, pansik udah mantaika penyereta raban nembiak dalam lumba enggau main endang kurang iya nya poin skor 44.93 reti nya kurang ari setengah raban nembiak Sarawak ngena maya lepa bejalaika aktiviti lumba enggau main,” ku iya nerang.

Beserimbai enggau tu, iya madahka 11 ari 137 perengkaguna sereta infrastruktur lumba enggau main ari baruh opis menteri tu benung dikena dalam mutarka isu COVID-19.

Ku iya, tu nyengkaum kem nembiak, Dewan Suarah, buding raban nembiak enggau stadium diselampur nengeri ti nyadika pengawa dalam nagang pengelekai igi penyakit tu.