BEBADI: Kerita SUV tepawah lalu bekalih ketegal tanah runtuh ba Kampung Gersik pagi kemari.

KUCHING:Ujan bangat kenyau ari ensanus ngujungka sekeda kandang endur diampuhka ai ke alai peranak dipindah ngagai Palan Ngenduh (PPS).

Nyentuk pukul 7 pagi ensanus,empat PPS dibuka iya nya entara iya baka Balai Raya SPS ungkup Taman Desa Wira, Balai Rekreasyen Bimajaya ungkup Tabuan Dayak, Balai Mayuhguna Kampung Sinar Budi enggau Balai Kampung Betong Kenawit di Serian.

Proses mindahka peranak ti tekeruga nya dibantu Opis Bomba enggau Penyelamat Malaysia (JBPM) enggau Angkatan Pertahanan Awam Malaysia (APM).

Bisi mega kandang endur bukai betapi enggau penusah bah tunggal iya nya Kampung Bintawa Hilir, Kampung Simpok enggau Kampung Bunuk, di Padawan sereta kandang menua Singai enggau Kampung Suba Buan di Bau.

Kelimpah ari nya, bisi mega penusah tanah tusur ti ngujungka peranak ba endur nya enda ulih pansut tama baka Jalai Padawan entara Kampung Peraya enggau Kampung Patos enggau Jalai Gersik ditu.

Ba Kampung Sadir enggau Kampung Garung ba Jalai Puncak Borneo mega diripotka bisi sekeda rumah ti rusak ketegal tanah tusur.

Opis Pengemata Gaya Hari Malaysia (MetMalaysia) apin lama udah madah gaya hari ti jai enggau ujan bangat di Sarawak enggau Sabah nyentuk ke sehari tu (14 Januari).

Opis nya dalam penerang madah, ujan bangat ba Sarawak dipelabaka nyadi ba pelilih menua Kuching, Serian, Samarahan, Sri Aman, Betong, Sarikei, Sibu enggau Mukah.