BEJALAIKA PENGAWA: Stanley merersa deriba perengka pengangkut ba Roundabout Paradom-Sibu.

SIBU:Orang ti betengahka jalai alun maya mansa empang jalai alun (SJR), nyema ditan sereta nadai permit pejalai, deka diberi jaku tangkan dulu sebedau diberi kompaun.

Kepala Polis Pelilih Sibu ACP Stanley Jonathan Ringgit madah, sida udah ngaga empang jalai ba tiga palan di pelilih menua nya kenyau ari Atur Nagang Pemindah Bisi Penetap (PKPB) diteritka berengkah ari pukul 12 tengah malam ensana.

“Tiga palan nya, iya nya ba Roundabout Sibu-Paradom, Batu 12 Jalai Oya sejak tengah malam kemari enggau ba simpang Jalai Pasai Siong ke udah berengkah kenyau ari malam Hari Enam nyin tadi.  

“Dua hari keterubah PKPB dipejalaika, kami deka meri jaku tangkan dulu ngagai orang ti nadai permit pejalai lalu atur ke patut deka diambi pengudah nya,” ku iya  madah ngagai pengarang berita ditu, pagi kemari.

Iya lebuh dikerandau ba SJR Roundbout Paradom madah,semina perengka pengangkut ti bejalaika pengawa ke berat aja dikemendarka mansa SJR.

Sibu udah ditukuka nyadi Zon Mirah COVID-19 enggau rikod 93 kes baru kenyau ari 8 Januari.

Ari baruh Atur 7 Nagang enggau Mutarka penyakit Berampit (Atur Dalam Kandang Menua Ke Dirampit) 2020, orang ke ditan ngaga pejalai entara pelilih menua ti nadai permit pejalai tau ditanggang ukum RM1,000.

Ku iya, tetiap pos ngempang jalai alun deka bisi empat iku raban polisti nitihka tiga syif begintir sereta dibantu raban soldadu.

Mensia mayuh ke deka minta permit pejalani, dipinta datai ke balai minta nya.

“Pom permit pejalai mega tau diambi ba tetiap balai polis,” ku iya.

Berebak enggau nya, iya madahka nadai pemesai enggau raban polis ari IPD Sibu dirampit COVID-19.

Ku iya baru, nadai siku pan bala pemesai enggau raban di IPD Sibu ke beperesa swab ditu ditemu positif.

Iya mega ngelalau orang ke dikuarantin di rumah pengelama 14 hari ngambika anang ngelanggar atur (anang mindah ari rumah) laban sida iya enda bebatak asur sereta deka ngeluarka kompaun ngagai orang ke ngelaban atur nya.