TERIMA MIH: Harden (empat kanan) nyuaka cek ungkup belanja ngagai pengari JKKK Rh Jeluka, Sungai Suang Sabu seraya diperatika sida ke bukai.

KUCHING: Kaban Kunsil Nengeri (ADUN) Simanggang, Datuk Francis Harden Hollis sekali agi ngingatka peranak dalam sitak ke diarika iya ngambika terus nyukung perintah nengeri ke diatu ari baruh Gabungan Parti Sarawak (GPS).

Harden lebuh bejaku maya Program Nemuai Ari Rumah Ke Rumah Pemesai Begulai Enggau Rayat ba Rh Jeluka Pangiet ba Sri Aman apin lama, madahka, pemansang enda ulih datai ke diri nyema nadai diperambu ari perintah ke merintah menua.

“Pengibuh Perintah Sarawak ari baruh GPS terang amat nengah mayuh bantu disediaka ngagai raban ke beguna bantu.

“Bantu berengkah ari ke ada ngagai pendam. Ngambika chunto, indai ti ngadaka anak deka diberi Bantuan Ibu Bersalin (BIB) sepenyampau RM450.

“Lalu anak ke ada deka diberi Endowment Funs Sarawak (EFS) sepenyampau RM1,000 sereta ulih dikeluarka mata duit maya umur anak nya 18 taun,” ku iya.

Harden ti mega Menteri Muda Pengelantang Pendiau Raban Bansa madahka, perintah bisi nyendiaka bantu ngagai sida ti udah nadai.

Ambika chunto, kaban belayan pengempu Kenyalang Gold Card (KGC) deka nerima Bantuan Ihsan Kematian (BIK) sepenyampau RM3,000 lebih pengempu nya udah nadai.

Ba pengerami nya Harden ngemendarka ungkup belanja ngagai JKKK enggau Biro Wanita Rh Jeluka, Sungai Suang Sabu ti sama bela nerima RM3,000 dikena bejalaika aktiviti ke meri penguntung ngagai kaban nya.

Kelimpah ari nya Tr Jeluka lebuh bejaku ba program ke sama madah penemu diri nyadi penyukung politik pemansang GPS.

Iya mega madah diri meri sukung penuh ngagai Harden nyadi chalun GPS ba DUN Simanggang.

Tr Jeluka sama meransang nembiak redak iya ngambika beserakup meri sukung tegap ngagai perintah GPS maya pengawa bepilih nengeri ti deka datai.